dastan-e-shauq kitni bar dohrai gai

dāstān-e-shauq kitnī baar dohrā.ī ga.ī

sunñe vāloñ meñ tavajjoh kī kamī paa.ī ga.ī

fikr hai sahmī huī jazba hai murjhāyā huā

mauj kī shorish ga.ī dariyā kī gahrā.ī ga.ī

husn bhī hai maslahat-bīñ ishq bhī duniyā-shanās

aap kī shohrat ga.ī yāroñ kī rusvā.ī ga.ī

ham to kahte the zamāna hī nahīñ jauhar-shanās

ġhaur se dekhā to apne meñ kamī paa.ī ga.ī

zaḳhm milte haiñ ilāj-e-zaḳhm-e-dil miltā nahīñ

vaz-e-qātil rah ga.ī rasm-e-masīhā.ī ga.ī

gard uḌaa.ī jo siyāsat ne vo āḳhir dhul ga.ī

ahl-e-dil kī ḳhaak meñ bhī zindagī paa.ī ga.ī

merī maddham lai kā jaadū ab bhī baaqī hai 'surūr'

fasl ke naġhme ga.e mausam kī shahnā.ī ga.ī

dastan-e-shauq kitni bar dohrai gai

sunne walon mein tawajjoh ki kami pai gai

fikr hai sahmi hui jazba hai murjhaya hua

mauj ki shorish gai dariya ki gahrai gai

husn bhi hai maslahat-bin ishq bhi duniya-shanas

aap ki shohrat gai yaron ki ruswai gai

hum to kahte the zamana hi nahin jauhar-shanas

ghaur se dekha to apne mein kami pai gai

zaKHm milte hain ilaj-e-zaKHm-e-dil milta nahin

waz-e-qatil rah gai rasm-e-masihai gai

gard uDai jo siyasat ne wo aaKHir dhul gai

ahl-e-dil ki KHak mein bhi zindagi pai gai

meri maddham lai ka jadu ab bhi baqi hai 'surur'

fasl ke naghme gae mausam ki shahnai gai