dahr mein ek tere siwa kya hai

dahr meñ ik tire sivā kyā hai

tū nahīñ hai to phir bhalā kyā hai

sila-e-zauq mai-kashī ma.alūm

zarf kyā shai hai hausla kyā hai

hāshiye apne matn hai un kā

mohtasib phir sazā jazā kyā hai

pūchhtā huuñ har ek saa.e se

chāñdnī kā atā-patā kyā hai

un ko hai da.avā-e-asīhā.ī

jo nahīñ jānte shifā kyā hai

kis liye gardish-e-mudām meñ haiñ

āsmānoñ ko ye huā kyā hai

le uḌegī buland-parvāzī

dosto sāya-e-humā kyā hai

itnī ifrāt aisī mahrūmī

dene vaale mo.āmla kyā hai

sail-e-shām-o-sahar meñ bahte haiñ

kyā ḳhabar ziist kyā qazā kyā hai

ham hī chup ho ga.e 'tamannā.ī'

de rahā hai koī sadā kyā hai

dahr mein ek tere siwa kya hai

tu nahin hai to phir bhala kya hai

sila-e-zauq mai-kashi malum

zarf kya shai hai hausla kya hai

hashiye apne matn hai un ka

mohtasib phir saza jaza kya hai

puchhta hun har ek sae se

chandni ka ata-pata kya hai

un ko hai dawa-e-asihai

jo nahin jaante shifa kya hai

kis liye gardish-e-mudam mein hain

aasmanon ko ye hua kya hai

le uDegi buland-parwazi

dosto saya-e-huma kya hai

itni ifraat aisi mahrumi

dene wale moamla kya hai

sail-e-sham-o-sahar mein bahte hain

kya KHabar zist kya qaza kya hai

hum hi chup ho gae 'tamannai'

de raha hai koi sada kya hai