dair-o-kaba ko rahguzar samjhe

dair-o-ka.aba ko rahguzar samjhe

dil ko jo koī terā ghar samjhe

ashk-e-ḳhūnīñ bahe to ham dil ko

hadaf-e-nāvak-e-nazar samjhe

nāla-e-ġhair ātish-afshāñ hai

shab-e-vaslat kī tum sahar samjhe

na uThā apne āstāñ se hameñ

ham to baiThe haiñ apnā ghar samjhe

naama de kar nazāra hai manzūr

ham taqāzā-e-nāma-bar samjhe

ġhair se pūchhte haiñ kūcha-e-yār

aise rahzan ko rāhbar samjhe

vo sitam karne aa.e haiñ ījād

aur ham aah kā asar samjhe

sarf karnā hai unsur-e-ābī

ham tirā girya chashm-e-tar samjhe

us se kyā mudda.ā kahūñ 'sālik'

sulh kī baat ko jo shar samjhe

dair-o-kaba ko rahguzar samjhe

dil ko jo koi tera ghar samjhe

ashk-e-KHunin bahe to hum dil ko

hadaf-e-nawak-e-nazar samjhe

nala-e-ghair aatish-afshan hai

shab-e-waslat ki tum sahar samjhe

na uTha apne aastan se hamein

hum to baiThe hain apna ghar samjhe

nama de kar nazara hai manzur

hum taqaza-e-nama-bar samjhe

ghair se puchhte hain kucha-e-yar

aise rahzan ko rahbar samjhe

wo sitam karne aae hain ijad

aur hum aah ka asar samjhe

sarf karna hai unsur-e-abi

hum tera girya chashm-e-tar samjhe

us se kya muddaa kahun 'salik'

sulh ki baat ko jo shar samjhe