dam-e-aKHir kisi ka shikwa-e-bedad karte hain

dam-e-āḳhir kisī kā shikva-e-bedād karte haiñ

nahīñ haiñ hichkiyāñ rah rah ke ham fariyād karte haiñ

rihā ho kar ham itnī ḳhātir-e-sayyād karte haiñ

nasheman raat ko din ko qafas ābād karte haiñ

fuġhāñ sun kar mirī vo naaz se irshād karte haiñ

kahāñ tū mar rahī ai maut tujh ko yaad karte haiñ

buḌhāpe meñ tujhe ham ai javānī yaad karte haiñ

ab apnī umr āḳhir is tarah barbād karte haiñ

ajab andāz se kahtī haiñ dil kī hasrateñ mujh se

hameñ ghar se nikāleñ ghar vo kyuuñ barbād karte haiñ

na āñkhoñ meñ kabhī aañsū na hoñThoñ par kabhī naale

na ham qismat ko rote haiñ na ham fariyād karte haiñ

gale meñ kyuuñ rag-e-jāñ ban ke ḳhanjar rah gayā terā

kahīñ bismil se aisī shoḳhiyāñ jallād karte haiñ

ye kyuuñ hai dushmanoñ ko dostoñ ko justujū us kī

vo mujh par rahm farmāte haiñ yā bedād karte haiñ

girānā hai hameñ kuchh bijliyāñ sayyād ke ghar par

asar-ḳhez ik na.ī tarz-e-fuġhāñ ījād karte haiñ

dil-e-muztar kī tasvīreñ bharī haiñ kyā muraqqe meñ

kuchh ustādī bhī is meñ mānī-o-bahzād karte haiñ

hamāre saath hai sayyād bhī yārab musībat meñ

kalejā muñh ko aatā hai jo ham fariyād karte haiñ

likhā kis husn se ḳhat meñ ki ham tujh se kashīda haiñ

kashish harfoñ kī aisī hai ki ham bhī saad karte haiñ

uThūñgā yūñhī mahshar meñ liye maiñ un ke ḳhanjar ko

gale mere lagāte haiñ ye kyā jallād karte haiñ

kahāñ vo haiñ kahāñ ham haiñ paḌā hai tafraqa yārab

vo ham ko yaad karte haiñ ham un ko yaad karte haiñ

mirī sūrat jo dekhī ham-nashīñ se hañs ke farmāyā

yahī kohsār par ab mātam-e-farhād karte haiñ

kabhī thoḌī sī pī lī lab nahīñ us kī bhī kuchh parvā

alag goshe meñ baiThe haiñ ḳhudā ko yaad karte haiñ

mujhe dekhā to bole mere kūche se nikal jaa.eñ

ye dil meñ chuTkiyāñ lete haiñ yā fariyād karte haiñ

buzurgī hai ki marte haiñ butān-e-shoḳh par ab bhī

'riyāz' is umr meñ kyuuñ āqibat barbād karte haiñ

dam-e-aKHir kisi ka shikwa-e-bedad karte hain

nahin hain hichkiyan rah rah ke hum fariyaad karte hain

riha ho kar hum itni KHatir-e-sayyaad karte hain

nasheman raat ko din ko qafas aabaad karte hain

fughan sun kar meri wo naz se irshad karte hain

kahan tu mar rahi ai maut tujh ko yaad karte hain

buDhape mein tujhe hum ai jawani yaad karte hain

ab apni umr aaKHir is tarah barbaad karte hain

ajab andaz se kahti hain dil ki hasraten mujh se

hamein ghar se nikalen ghar wo kyun barbaad karte hain

na aankhon mein kabhi aansu na honThon par kabhi nale

na hum qismat ko rote hain na hum fariyaad karte hain

gale mein kyun rag-e-jaan ban ke KHanjar rah gaya tera

kahin bismil se aisi shoKHiyan jallad karte hain

ye kyun hai dushmanon ko doston ko justuju us ki

wo mujh par rahm farmate hain ya bedad karte hain

girana hai hamein kuchh bijliyan sayyaad ke ghar par

asar-KHez ek nai tarz-e-fughan ijad karte hain

dil-e-muztar ki taswiren bhari hain kya muraqqe mein

kuchh ustadi bhi is mein mani-o-bahzad karte hain

hamare sath hai sayyaad bhi yarab musibat mein

kaleja munh ko aata hai jo hum fariyaad karte hain

likha kis husn se KHat mein ki hum tujh se kashida hain

kashish harfon ki aisi hai ki hum bhi sad karte hain

uThunga yunhi mahshar mein liye main un ke KHanjar ko

gale mere lagate hain ye kya jallad karte hain

kahan wo hain kahan hum hain paDa hai tafraqa yarab

wo hum ko yaad karte hain hum un ko yaad karte hain

meri surat jo dekhi ham-nashin se hans ke farmaya

yahi kohsar par ab matam-e-farhad karte hain

kabhi thoDi si pi li lab nahin us ki bhi kuchh parwa

alag goshe mein baiThe hain KHuda ko yaad karte hain

mujhe dekha to bole mere kuche se nikal jaen

ye dil mein chuTkiyan lete hain ya fariyaad karte hain

buzurgi hai ki marte hain butan-e-shoKH par ab bhi

'riyaz' is umr mein kyun aaqibat barbaad karte hain