dam-e-aKHir musibat kaT do bahr-e-KHuda meri

dam-e-āḳhir musībat kaaT do bahr-e-ḳhudā merī

tum aa kar dard ke parde meñ kar jaao davā merī

mohabbat but-kade meñ chal ke us kā faisla kar de

ḳhudā merā ḳhudā hai yā ye mūrat hai ḳhudā merī

yahāñ se jab ga.ī thī tab asar par ḳhaar khaa.e thī

vahāñ se phuul barsātī huī palTī duā merī

tū hī kah de ye jism-e-zār merā hai ki terā hai

tū hī kah de ye rūh-e-nā-tavāñ terī hai yā merī

paḌā hai tafraqa jis din se kyā kyā yaad kartī hai

udhar mujh ko jafā terī idhar tujh ko vafā merī

muqayyad ho ke lutf-e-hastī-e-āzād bhī khoyā

vo kyā thī ibtidā merī ye kyā hai intihā merī

vahāñ jab the to jism-e-nā-tavāñ meñ ruuh phūñkī thī

yahāñ jis din se aa.e aap ban baiThe qazā merī

miyān-e-hashr ye kāfir baḌe itrā.e phirte haiñ

mazā aa jaa.e aise meñ agar sun le ḳhudā merī

kisī kā jalva-e-rañgīñ ye kahtā hai inheñ puujo

ye us patthar ke but haiñ jis pe pistī thī hinā merī

na-jāne kaun se yūsuf kā jalva mujh meñ pinhāñ hai

zuleḳhā aaj tak kartī hai 'muztar' iltijā merī

dam-e-aKHir musibat kaT do bahr-e-KHuda meri

tum aa kar dard ke parde mein kar jao dawa meri

mohabbat but-kade mein chal ke us ka faisla kar de

KHuda mera KHuda hai ya ye murat hai KHuda meri

yahan se jab gai thi tab asar par KHar khae thi

wahan se phul barsati hui palTi dua meri

tu hi kah de ye jism-e-zar mera hai ki tera hai

tu hi kah de ye ruh-e-na-tawan teri hai ya meri

paDa hai tafraqa jis din se kya kya yaad karti hai

udhar mujh ko jafa teri idhar tujh ko wafa meri

muqayyad ho ke lutf-e-hasti-e-azad bhi khoya

wo kya thi ibtida meri ye kya hai intiha meri

wahan jab the to jism-e-na-tawan mein ruh phunki thi

yahan jis din se aae aap ban baiThe qaza meri

miyan-e-hashr ye kafir baDe itrae phirte hain

maza aa jae aise mein agar sun le KHuda meri

kisi ka jalwa-e-rangin ye kahta hai inhen pujo

ye us patthar ke but hain jis pe pisti thi hina meri

na-jaane kaun se yusuf ka jalwa mujh mein pinhan hai

zuleKHa aaj tak karti hai 'muztar' iltija meri