dam-e-ruKHsat jo un se kah ke main uTTha KHuda-hafiz

dam-e-ruḳhsat jo un se kah ke maiñ uTThā ḳhudā-hāfiz

lage jhuñjhlā ke vo kahne bahut achchhā ḳhudā-hāfiz

jo maiñ jaatā huuñ uTh kar fī-amānillāh kahtā huuñ

tire muñh se na o kāfir kabhī niklā ḳhudā-hāfiz

kahā hai kis ne tum se chūmo-chāTo jā ke patthar ko

tumhāre zāhido ab den o īmāñ kā ḳhudā hāfiz

hifāzat meñ vo dekhe ġhair kī tujh ko qayāmat hai

kabhī jo bad-gumānī se na ho kahtā ḳhudā-hāfiz

sunā hai aaj vo but ḳhuub hī ban-Than ke aatā hai

tire dil kā are o 'anjum'-e-shaidā ḳhudā hāfiz

dam-e-ruKHsat jo un se kah ke main uTTha KHuda-hafiz

lage jhunjhla ke wo kahne bahut achchha KHuda-hafiz

jo main jata hun uTh kar fi-amanillah kahta hun

tere munh se na o kafir kabhi nikla KHuda-hafiz

kaha hai kis ne tum se chumo-chaTo ja ke patthar ko

tumhaare zahido ab den o iman ka KHuda hafiz

hifazat mein wo dekhe ghair ki tujh ko qayamat hai

kabhi jo bad-gumani se na ho kahta KHuda-hafiz

suna hai aaj wo but KHub hi ban-Than ke aata hai

tere dil ka are o 'anjum'-e-shaida KHuda hafiz