dam-e-tamir taKHrib-e-jahan kuchh aur kahti hai

dam-e-ta.amīr taḳhrīb-e-jahāñ kuchh aur kahtī hai

kalī kuchh aur kahtī hai ḳhizāñ kuchh aur kahtī hai

kada kī yaad sab kuchh hai magar ai zāhid-e-nādāñ

diloñ se mastī-e-chashm-e-butāñ kuchh aur kahtī hai

kabhī shāyad vo daur aa.e jab insāñ ho sake insāñ

abhī to gardish-e-haft-āsmāñ kuchh aur kahtī hai

banā kar āshiyāne fasl-e-gul meñ shaad haiñ lekin

chaman vāloñ se barq-e-be-amāñ kuchh aur kahtī hai

bahut mushkil hai manzil tak jo ahl-e-kārvāñ pahuñcheñ

ki ham se gard-e-rāh-e-kārvāñ kuchh aur kahtī hai

ye ġhaflat ai hayāt-e-chand-roza ke parastāro

uTho tum se hayāt-e-jāvedāñ kuchh aur kahtī hai

asar naġhmoñ meñ bhī hai nāla-hā-e-ġham meñ bhī 'shā.ir'

magar TuuTe hue dil kī fuġhāñ kuchh aur kahtī hai

dam-e-tamir taKHrib-e-jahan kuchh aur kahti hai

kali kuchh aur kahti hai KHizan kuchh aur kahti hai

kada ki yaad sab kuchh hai magar ai zahid-e-nadan

dilon se masti-e-chashm-e-butan kuchh aur kahti hai

kabhi shayad wo daur aae jab insan ho sake insan

abhi to gardish-e-haft-asman kuchh aur kahti hai

bana kar aashiyane fasl-e-gul mein shad hain lekin

chaman walon se barq-e-be-aman kuchh aur kahti hai

bahut mushkil hai manzil tak jo ahl-e-karwan pahunchen

ki hum se gard-e-rah-e-karwan kuchh aur kahti hai

ye ghaflat ai hayat-e-chand-roza ke parastaro

uTho tum se hayat-e-jawedan kuchh aur kahti hai

asar naghmon mein bhi hai nala-ha-e-gham mein bhi 'shair'

magar TuTe hue dil ki fughan kuchh aur kahti hai