dam toDta hun KHak pe gor-o-kafan se dur

dam toḌtā huuñ ḳhaak pe gor-o-kafan se duur

yā-rab kisī kī maut na aa.e vatan se duur

ahl-e-chaman kā sheva-e-begānagī na pūchh

ham to chaman meñ rahte hue haiñ chaman se duur

āh-e-dil-e-ġharīb qayāmat se kam nahīñ

ik baat kah rahā huuñ kisī husn-e-zan se duur

dil se hai be-niyāz umīdoñ kī raushnī

jalte haiñ ye charāġh magar anjuman se duur

is daur meñ bhī haq ke parastār kam nahīñ

ye aur baat hai ki haiñ dār-o-rasan se duur

aao qafas meñ baiTh ke ro.eñ bahār ko

tum bhī chaman se duur ho ham bhī chaman se duur

'raunaq' junūn-e-shauq kā 'ālam bhī ḳhuub hai

ḳhushiyoñ se be-niyāz huuñ ranj-o-mehan se duur

dam toDta hun KHak pe gor-o-kafan se dur

ya-rab kisi ki maut na aae watan se dur

ahl-e-chaman ka shewa-e-beganagi na puchh

hum to chaman mein rahte hue hain chaman se dur

aah-e-dil-e-gharib qayamat se kam nahin

ek baat kah raha hun kisi husn-e-zan se dur

dil se hai be-niyaz umidon ki raushni

jalte hain ye charagh magar anjuman se dur

is daur mein bhi haq ke parastar kam nahin

ye aur baat hai ki hain dar-o-rasan se dur

aao qafas mein baiTh ke roen bahaar ko

tum bhi chaman se dur ho hum bhi chaman se dur

'raunaq' junun-e-shauq ka 'alam bhi KHub hai

KHushiyon se be-niyaz hun ranj-o-mehan se dur