dar-e-kaenat jo wa kare usi aagahi ki talash hai

dar-e-kā.enāt jo vā kare usī āgahī kī talāsh hai

mujhe raushnī kī talāsh thī mujhe raushnī kī talāsh hai

ġham-e-zindagī ke fishār meñ tirī aarzū ke ġhubār meñ

isī be-hisī ke hisār meñ mujhe zindagī kī talāsh hai

ye jo sarsarī sī nashāt hai ye to chand lamhoñ kī baat hai

mirī ruuh tak jo utar sake mujhe us ḳhushī kī talāsh hai

ye jo aag sī hai dabī dabī nahīñ dosto mire kaam kī

vo jo ek aan meñ phūñk de usī sho.alagī kī talāsh hai

ye jo sāḳhta se haiñ qahqahe mire dil ko lagte haiñ bojh se

vo jo apne aap meñ mast hoñ mujhe us hañsī kī talāsh hai

ye jo mel-jol kī baat hai ye jo majlisī sī hayāt hai

mujhe us se koī ġharaz nahīñ mujhe dostī kī talāsh hai

dar-e-kaenat jo wa kare usi aagahi ki talash hai

mujhe raushni ki talash thi mujhe raushni ki talash hai

gham-e-zindagi ke fishaar mein teri aarzu ke ghubar mein

isi be-hisi ke hisar mein mujhe zindagi ki talash hai

ye jo sarsari si nashat hai ye to chand lamhon ki baat hai

meri ruh tak jo utar sake mujhe us KHushi ki talash hai

ye jo aag si hai dabi dabi nahin dosto mere kaam ki

wo jo ek aan mein phunk de usi shoalagi ki talash hai

ye jo saKHta se hain qahqahe mere dil ko lagte hain bojh se

wo jo apne aap mein mast hon mujhe us hansi ki talash hai

ye jo mel-jol ki baat hai ye jo majlisi si hayat hai

mujhe us se koi gharaz nahin mujhe dosti ki talash hai