dar-e-KHayal bhi kholen siyah shab bhi karen

dar-e-ḳhayāl bhī kholeñ siyāh shab bhī kareñ

phir us ke ba.ad tujhe socheñ ye ġhazab bhī kareñ

vo jis ne shaam ke māthe pe haath pherā hai

ham us charāġh-e-havā-sāz kā adab bhī kareñ

siyāhiyāñ sī bikharne lagī haiñ siine meñ

ab us sitāra-e-shab-tāb kī talab bhī kareñ

ye imtiyāz zarūrī hai ab ibādat meñ

vahī duā jo nazar kar rahī hai lab bhī kareñ

ki jaise ḳhvāb dikhānā tasalliyāñ denā

kuchh ek kaam mohabbat meñ be-sabab bhī kareñ

maiñ jāntā huuñ ki tābīr hī nahīñ mumkin

vo mere ḳhvāb kī tashrīh chāhe jab bhī kareñ

shikast-e-ḳhvāb kī manzil bhī kab na.ī hai hameñ

vahī jo karte chale aa.eñ haiñ so ab bhī kareñ

dar-e-KHayal bhi kholen siyah shab bhi karen

phir us ke baad tujhe sochen ye ghazab bhi karen

wo jis ne sham ke mathe pe hath phera hai

hum us charagh-e-hawa-saz ka adab bhi karen

siyahiyan si bikharne lagi hain sine mein

ab us sitara-e-shab-tab ki talab bhi karen

ye imtiyaz zaruri hai ab ibaadat mein

wahi dua jo nazar kar rahi hai lab bhi karen

ki jaise KHwab dikhana tasalliyan dena

kuchh ek kaam mohabbat mein be-sabab bhi karen

main jaanta hun ki tabir hi nahin mumkin

wo mere KHwab ki tashrih chahe jab bhi karen

shikast-e-KHwab ki manzil bhi kab nai hai hamein

wahi jo karte chale aaen hain so ab bhi karen