dar-e-KHazina-e-sad-raaz kholta hai koi

dar-e-ḳhazīna-e-sad-rāz kholtā hai koī

na jaane kaun hai vo mujh meñ boltā hai koī

ajab kured ajab bekalī sī hai jaise

mujhe mirī rag-e-jāñ tak TaToltā hai koī

hujūm hai mire siine meñ abr-pāroñ kā

guhar bikherne vaalā huuñ roltā hai koī

hayāt-o-marg-o-tulū-o-ġhurūb hai duniyā

ki par sameTtā hai koī toltā hai koī

havā kā lams ye būñdeñ ḳhunuk ḳhunuk 'ḳhurshīd'

mujhe to aaj fazāoñ meñ gholtā hai koī

dar-e-KHazina-e-sad-raaz kholta hai koi

na jaane kaun hai wo mujh mein bolta hai koi

ajab kured ajab bekali si hai jaise

mujhe meri rag-e-jaan tak TaTolta hai koi

hujum hai mere sine mein abr-paron ka

guhar bikherne wala hun rolta hai koi

hayat-o-marg-o-tulu-o-ghurub hai duniya

ki par sameTta hai koi tolta hai koi

hawa ka lams ye bunden KHunuk KHunuk 'KHurshid'

mujhe to aaj fazaon mein gholta hai koi