در کھول کے زنداں کے ہر قید اٹھا دی ہے

در کھول کے زنداں کے ہر قید اٹھا دی ہے

لیکن میرے ہونٹوں پہ اک مہر لگا دی ہے

اے اہل چمن پوچھو کیا سوچ کے مالی نے

کانٹوں کو دلارا ہے پھولوں کو سزا دی ہے

صحراؤں سے ہم گزرے کانٹوں کو لہو دے کر

ہر موڑ پہ منزل کے اک شمع جلا دی ہے

پھر شاخ نشیمن سے اٹھے گا دھواں برسوں

گلچیں نے گلستاں میں پھر آگ لگا دی ہے

اے اہل غرض تم نے تعمیر تو کی لیکن

ہر دل میں تعصب کی دیوار اٹھا دی ہے

تعبیر ملے شاید اب کل کے مؤرخ کو

ہم نے نئے خوابوں کی تصویر سجا دی ہے

احسان شبانہؔ ہے یہ اہل گلستاں کا

ہم جیسے دوانوں کو کانٹوں کی قبا دی ہے