dar-KHur-e-qahr-o-ghazab jab koi hum sa na hua

dar-ḳhur-e-qahr-o-ġhazab jab koī ham sā na huā

phir ġhalat kyā hai ki ham sā koī paidā na huā

bandagī meñ bhī vo āzāda o ḳhud-bīñ haiñ ki ham

ulTe phir aa.e dar-e-ka.aba agar vā na huā

sab ko maqbūl hai da.avā tirī yaktā.ī kā

rū-ba-rū koī but-e-ā.ina-sīmā na huā

kam nahīñ nāzish-e-hamnāmi-e-chashm-e-ḳhūbāñ

terā bīmār burā kyā hai gar achchhā na huā

siine kā daaġh hai vo naala ki lab tak na gayā

ḳhaak kā rizq hai vo qatra ki dariyā na huā

naam kā mere hai jo dukh ki kisī ko na milā

kaam meñ mere hai jo fitna ki barpā na huā

har-bun-e-mū se dam-e-zikr na Tapke ḳhuuñ naab

hamza kā qissa huā ishq kā charchā na huā

qatra meñ dajla dikhā.ī na de aur juzv meñ kul

khel laḌkoñ kā huā dīda-e-bīnā na huā

thī ḳhabar garm ki 'ġhālib' ke uḌeñge purze

dekhne ham bhī ga.e the pa tamāshā na huā

dar-KHur-e-qahr-o-ghazab jab koi hum sa na hua

phir ghalat kya hai ki hum sa koi paida na hua

bandagi mein bhi wo aazada o KHud-bin hain ki hum

ulTe phir aae dar-e-kaba agar wa na hua

sab ko maqbul hai dawa teri yaktai ka

ru-ba-ru koi but-e-aina-sima na hua

kam nahin nazish-e-hamnami-e-chashm-e-KHuban

tera bimar bura kya hai gar achchha na hua

sine ka dagh hai wo nala ki lab tak na gaya

KHak ka rizq hai wo qatra ki dariya na hua

nam ka mere hai jo dukh ki kisi ko na mila

kaam mein mere hai jo fitna ki barpa na hua

har-bun-e-mu se dam-e-zikr na Tapke KHun nab

hamza ka qissa hua ishq ka charcha na hua

qatra mein dajla dikhai na de aur juzw mein kul

khel laDkon ka hua dida-e-bina na hua

thi KHabar garm ki 'ghaalib' ke uDenge purze

dekhne hum bhi gae the pa tamasha na hua