dar koi jannat-e-pindar ka wa karta hun

dar koī jannat-e-pindār kā vā kartā huuñ

ā.īna dekh ke maiñ hamd-o-sanā kartā huuñ

raat aur din ke kināroñ ke ta.alluq kī qasam

vaqt milte haiñ to milne kī duā kartā huuñ

vo tirā ūñchī havelī ke qafas meñ rahnā

yaad aa.e to parindoñ ko rihā kartā huuñ

ek laḌkī ke ta.āqub meñ ka.ī barsoñ se

nit-na.ī zaat ke hotel meñ rahā kartā huuñ

pūchhtā rahtā huuñ maujoñ se guhar kī ḳhabreñ

ashk-e-gum-gashta kā dariyā se pata kartā huuñ

mujh se 'mansūr' kisī ne to ye pūchā hotā

nañge paañv maiñ tire shahr meñ kyā kartā huuñ

dar koi jannat-e-pindar ka wa karta hun

aaina dekh ke main hamd-o-sana karta hun

raat aur din ke kinaron ke talluq ki qasam

waqt milte hain to milne ki dua karta hun

wo tera unchi haweli ke qafas mein rahna

yaad aae to parindon ko riha karta hun

ek laDki ke taaqub mein kai barson se

nit-nai zat ke hotel mein raha karta hun

puchhta rahta hun maujon se guhar ki KHabren

ashk-e-gum-gashta ka dariya se pata karta hun

mujh se 'mansur' kisi ne to ye pucha hota

nange panw main tere shahr mein kya karta hun