dar-o-bast-e-anasir para para hone wala hai

dar-o-bast-e-anāsir paara paara hone vaalā hai

jo pahle ho chukā hai phir dobāra hone vaalā hai

gumān-e-mahr meñ ye baat hī shāyad nahīñ hogī

huvaidā ḳhaak se bhī ik sharāra hone vaalā hai

kināra kar na ai duniyā mirī hast-e-zabūnī se

koī din meñ mirā raushan sitāra hone vaalā hai

pighalne jā rahā hai phir se bahr-e-munjamid koī

samundar hī samundar kā kināra hone vaalā hai

bahut maḳhfī jise rakkhā gayā thā chashm-e-imkāñ se

abhī kuchh din meñ us kā bhī nazāra hone vaalā hai

hamīñ haiñ us kī nīñdeñ aur hamīñ us ke nigahbāñ haiñ

hamāre ḳhvāb par kis kā ijāra hone vaalā hai

vahī 'tāriq'-na.īm ab is qafas ke baab kholegā

kisī kī aañkh se jo ik ishāra hone vaalā hai

dar-o-bast-e-anasir para para hone wala hai

jo pahle ho chuka hai phir dobara hone wala hai

guman-e-mahr mein ye baat hi shayad nahin hogi

huwaida KHak se bhi ek sharara hone wala hai

kinara kar na ai duniya meri hast-e-zabuni se

koi din mein mera raushan sitara hone wala hai

pighalne ja raha hai phir se bahr-e-munjamid koi

samundar hi samundar ka kinara hone wala hai

bahut maKHfi jise rakkha gaya tha chashm-e-imkan se

abhi kuchh din mein us ka bhi nazara hone wala hai

hamin hain us ki ninden aur hamin us ke nigahban hain

hamare KHwab par kis ka ijara hone wala hai

wahi 'tariq'-naim ab is qafas ke bab kholega

kisi ki aankh se jo ek ishaara hone wala hai