dar-o-diwar ka badla hua huliya likhen

dar-o-dīvār kā badlā huā huliya likheñ

is havelī kā koī dūsrā naqsha likheñ

na kanīzoñ kā vo jhurmuT na bahī-ḳhvāhoñ kā

dil kī mānind mahal ko bhī akelā likkheñ

paar jo ham ne kiyā aag kā dariyā vo thā

zindagī ab tujhe biitā huā lamha likkheñ

tishnagī tishna-labī apnā muqaddar hai to

ab samundar jo likhā jaa.e to pyāsā likkheñ

kitne hissoñ meñ hameñ baañT rahī hai duniyā

aur taqāza hai hamīñ se use achchhā likkheñ

ham ne jab dekhā to tasvīr kā har ruḳh dekhā

aa.ina ban ke likheñ ab jo sarāpā likkheñ

bol anmol haiñ ye baat sadā yaad rahe

aap jo 'sīmā' likheñ ab vo nirālā likkheñ

dar-o-diwar ka badla hua huliya likhen

is haweli ka koi dusra naqsha likhen

na kanizon ka wo jhurmuT na bahi-KHwahon ka

dil ki manind mahal ko bhi akela likkhen

par jo hum ne kiya aag ka dariya wo tha

zindagi ab tujhe bita hua lamha likkhen

tishnagi tishna-labi apna muqaddar hai to

ab samundar jo likha jae to pyasa likkhen

kitne hisson mein hamein banT rahi hai duniya

aur taqaza hai hamin se use achchha likkhen

hum ne jab dekha to taswir ka har ruKH dekha

aaina ban ke likhen ab jo sarapa likkhen

bol anmol hain ye baat sada yaad rahe

aap jo 'sima' likhen ab wo nirala likkhen