dard-e-dil ke sath kya mere masiha kar diya

dard-e-dil ke saath kyā mere masīhā kar diyā

be-qarārī baḌh ga.ī hai jab se achchhā kar diyā

kyā ajab thī un ke pākīza tabassum kī kiran

qalb kī tārīk bastī meñ ujālā kar diyā

jab na un ke rāz-e-vahshat tak pahuñch paa.ī nazar

hosh vāloñ ne junūñ vāloñ ko rusvā kar diyā

nafratoñ kī had banā kar apne mere darmiyāñ

vo bhī tanhā rah ga.e mujh ko bhī tanhā kar diyā

ab to had se baḌh ga.ī thiiñ apne dil kī uljhaneñ

muskurā kar aap ne ġham kā mudāvā kar diyā

har-nafas bād-e-sahar kī tarah maujeñ le uThā

kyā kisī ne un kī aamad kā ishārā kar diyā

dekh kar saaqī kī mastāna nigāhī ai 'guhar'

zindagī ko ham ne vaqf-e-jām-o-mīnā kar diyā

dard-e-dil ke sath kya mere masiha kar diya

be-qarari baDh gai hai jab se achchha kar diya

kya ajab thi un ke pakiza tabassum ki kiran

qalb ki tarik basti mein ujala kar diya

jab na un ke raaz-e-wahshat tak pahunch pai nazar

hosh walon ne junun walon ko ruswa kar diya

nafraton ki had bana kar apne mere darmiyan

wo bhi tanha rah gae mujh ko bhi tanha kar diya

ab to had se baDh gai thin apne dil ki uljhanen

muskura kar aap ne gham ka mudawa kar diya

har-nafas baad-e-sahar ki tarah maujen le uTha

kya kisi ne un ki aamad ka ishaara kar diya

dekh kar saqi ki mastana nigahi ai 'guhar'

zindagi ko hum ne waqf-e-jam-o-mina kar diya