dard-e-dil ki dawa kare koi

dard-e-dil kī davā kare koī

ye nahīñ to duā kare koī

aarzū hai jafā kare koī

ho na ye bhī to kyā kare koī

ye ishāre haiñ kis qadar ḳhāmosh

in kī tafsīr kyā kare koī

jo bhī hai dil kā haal zāhir hai

vo na samjheñ to kyā kare koī

arz-e-matlab pe bhī vo barham haiñ

kis tarah iltijā kare koī

ik zamāne se dushmanī le kar

kyoñ kisī se vafā kare koī

baat terī bajā hai ai nāseh

dil na maane to kyā kare koī

lab pe aatī nahīñ hai dil kī baat

merā matlab adā kare koī

zabt-e-ġham sheva-e-mohabbat hai

kyoñ jafā kā gila kare koī

jis ko bhī dekhiye vo hai be-mehr

kyā kisī se gila kare koī

vo ḳhud apnī jafā pe nādim haiñ

un se ab kyā gila kare koī

merī jān-e-hazīñ hai mushkil meñ

aa hī jaa.e ḳhudā kare koī

dil-e-nādāñ ke sau taqāze haiñ

bebasī ho to kyā kare koī

ai 'kañval' ab yahī tamannā hai

ham se ahd-e-vafā kare koī

dard-e-dil ki dawa kare koi

ye nahin to dua kare koi

aarzu hai jafa kare koi

ho na ye bhi to kya kare koi

ye ishaare hain kis qadar KHamosh

in ki tafsir kya kare koi

jo bhi hai dil ka haal zahir hai

wo na samjhen to kya kare koi

arz-e-matlab pe bhi wo barham hain

kis tarah iltija kare koi

ek zamane se dushmani le kar

kyon kisi se wafa kare koi

baat teri baja hai ai naseh

dil na mane to kya kare koi

lab pe aati nahin hai dil ki baat

mera matlab ada kare koi

zabt-e-gham shewa-e-mohabbat hai

kyon jafa ka gila kare koi

jis ko bhi dekhiye wo hai be-mehr

kya kisi se gila kare koi

wo KHud apni jafa pe nadim hain

un se ab kya gila kare koi

meri jaan-e-hazin hai mushkil mein

aa hi jae KHuda kare koi

dil-e-nadan ke sau taqaze hain

bebasi ho to kya kare koi

ai 'kanwal' ab yahi tamanna hai

hum se ahd-e-wafa kare koi