dard-e-dil moatabar bhi hota hai

dard-e-dil mo'atabar bhī hotā hai

shaḳhsiyat kā asar bhī hotā hai

kis nagar meñ qayām kartā maiñ

kahīñ majnūñ kā ghar bhī hotā hai

shahr meñ aa ke ye huā mālūm

aadmī jānvar bhī hotā hai

ek be-ḳhauf justujū ke saath

ek anjān Dar bhī hotā hai

shikva-e-dahr kyā ki dukh aksar

apne ehsās par bhī hotā hai

kūcha-gardo tumheñ patā hai kyā

ek zehnī safar bhī hotā hai

jo bahār-o-ḳhizāñ ke ġham sah jaa.e

vahī paudā shajar bhī hotā hai

fan se iz.hār-e-fan hai mushkil-tar

dard-e-dil dard-e-sar bhī hotā hai

dard-e-dil mo'atabar bhi hota hai

shaKHsiyat ka asar bhi hota hai

kis nagar mein qayam karta main

kahin majnun ka ghar bhi hota hai

shahr mein aa ke ye hua malum

aadmi jaanwar bhi hota hai

ek be-KHauf justuju ke sath

ek anjaan Dar bhi hota hai

shikwa-e-dahr kya ki dukh aksar

apne ehsas par bhi hota hai

kucha-gardo tumhein pata hai kya

ek zehni safar bhi hota hai

jo bahaar-o-KHizan ke gham sah jae

wahi pauda shajar bhi hota hai

fan se izhaar-e-fan hai mushkil-tar

dard-e-dil dard-e-sar bhi hota hai