dard-e-musalsal se aahon mein paida wo tasir hui

dard-e-musalsal se aahoñ meñ paidā vo tāsīr huī

aksar chāragaroñ kī hālat mujh se sivā gambhīr huī

kyā jaane kyuuñ mujh se merī bargashta taqdīr huī

mamlikat-e-aish aañkh jhapakte hī ġham kī jāgīr huī

us ne mere shīsha-e-dil ko dekh ke kyuuñ muñh moḌ liyā

shāyad is ā.īne meñ us ko zāhir koī lakīr huī

jab bhī likkhā hāl-e-dil-e-muztar maiñ ne us ko raat ga.e

tā-ba-sahar ashk-afshānī se zaa.e.a vo tahrīr huī

baḌhtī jaatī hai dūrī-e-manzil jab se junūñ ne chhoḌā saath

ab to ḳhirad har gaam par apne pairoñ kī zanjīr huī

mujh ko atā karte vo yaqīnan merī talab se sivā lekin

ḳhuddārī meñ haath na phailā sharm jo dāman-gīr huī

kis ko ḳhabar hai un kī galī meñ kitne diloñ kā ḳhuun huā

ra.anā.ī meñ un kī galī jab vādī-e-kashmīr huī

un se karūñ iz.hār-e-tamannā sochā rakh kar uzr-e-junūñ

lekin vo bhī raas na aayā lā-hāsil tadbīr huī

Tap-Tap aañkh se aañsū Tapke 'ājiz' āh-e-sard ke saath

mere sāmne nazr-e-ātish jab merī tasvīr huī

dard-e-musalsal se aahon mein paida wo tasir hui

aksar chaaragaron ki haalat mujh se siwa gambhir hui

kya jaane kyun mujh se meri bargashta taqdir hui

mamlikat-e-aish aankh jhapakte hi gham ki jagir hui

us ne mere shisha-e-dil ko dekh ke kyun munh moD liya

shayad is aaine mein us ko zahir koi lakir hui

jab bhi likkha haal-e-dil-e-muztar main ne us ko raat gae

ta-ba-sahar ashk-afshani se zaea wo tahrir hui

baDhti jati hai duri-e-manzil jab se junun ne chhoDa sath

ab to KHirad har gam par apne pairon ki zanjir hui

mujh ko ata karte wo yaqinan meri talab se siwa lekin

KHuddari mein hath na phaila sharm jo daman-gir hui

kis ko KHabar hai un ki gali mein kitne dilon ka KHun hua

ranai mein un ki gali jab wadi-e-kashmir hui

un se karun izhaar-e-tamanna socha rakh kar uzr-e-junun

lekin wo bhi ras na aaya la-hasil tadbir hui

Tap-Tap aankh se aansu Tapke 'ajiz' aah-e-sard ke sath

mere samne nazr-e-atish jab meri taswir hui