dard ka dard se darman karte

dard kā dard se darmāñ karte

yuuñ ilāj-e-ġham-e-jānāñ karte

ham agar fikr-e-gulistāñ karte

roz dāman ko garebāñ karte

ghar kī vīrānī se fursat na milī

varna ham sair-e-bayābāñ karte

kitnā arzāñ hai ġharīboñ kā lahū

aap to roz charāġhāñ karte

dil umañD aayā thā baiThe baiThe

kaise andāza-e-tūfāñ karte

dil kā ḳhuun aañkh tak aa hī jaatā

aap kuchh zikr-e-gulistāñ karte

umr guzrī hai hamārī 'ehsās'

ḳhātir-e-shām-e-ġharībāñ karte

dard ka dard se darman karte

yun ilaj-e-gham-e-jaanan karte

hum agar fikr-e-gulistan karte

roz daman ko gareban karte

ghar ki virani se fursat na mili

warna hum sair-e-bayaban karte

kitna arzan hai gharibon ka lahu

aap to roz charaghan karte

dil umanD aaya tha baiThe baiThe

kaise andaza-e-tufan karte

dil ka KHun aankh tak aa hi jata

aap kuchh zikr-e-gulistan karte

umr guzri hai hamari 'ehsas'

KHatir-e-sham-e-ghariban karte