dard ki dhup Dhale gham ke zamane jaen

dard kī dhuup Dhale ġham ke zamāne jaa.eñ

dekhiye ruuh se kab daaġh purāne jaa.eñ

ham ko bas terī hī chaukhaT pe paḌe rahnā hai

tujh se bichhḌeñ na kisī aur Thikāne jaa.eñ

apnī dīvār-e-anā aap hī kar ke mismār

apne rūThoñ ko chalo aaj manāne jaa.eñ

jaane kyā raaz chhupā hai tirī sālārī meñ

tū jahāñ jaa.e tire pīchhe zamāne jaa.eñ

raheñ gumnām to bas tujh se hī mansūb raheñ

jaane jaa.eñ to tire naam se jaane jaa.eñ

dekh pā.eñge un āñkhoñ meñ udāsī kaise

apne dukhḌe na 'ziyā' un ko sunāne jaa.eñ

dard ki dhup Dhale gham ke zamane jaen

dekhiye ruh se kab dagh purane jaen

hum ko bas teri hi chaukhaT pe paDe rahna hai

tujh se bichhDen na kisi aur Thikane jaen

apni diwar-e-ana aap hi kar ke mismar

apne ruThon ko chalo aaj manane jaen

jaane kya raaz chhupa hai teri salari mein

tu jahan jae tere pichhe zamane jaen

rahen gumnam to bas tujh se hi mansub rahen

jaane jaen to tere nam se jaane jaen

dekh paenge un aankhon mein udasi kaise

apne dukhDe na 'ziya' un ko sunane jaen