dard ki sakit nadi phir se rawan hone ko hai

dard kī sākit nadī phir se ravāñ hone ko hai

mauj-e-hairat kā tamāshā ab kahāñ hone ko hai

jo girāñ-bār-e-samā.at thā kabhī sab ke liye

ab vahī kalima yahāñ husn-e-bayāñ hone ko hai

kyuuñ kareñ vo apnī qismat ke sitāre kī talāsh

dastaras meñ jin ke saarā āsmāñ hone ko hai

mujh ko us manzil se guzre kitnī muddat ho ga.ī

vaqt merī justujū meñ ab jahāñ hone ko hai

tajrabe kī aañch par har shai hai yuuñ ātash-bajāñ

chāñdnī bhī sūrat-e-barq-e-tapāñ hone ko hai

āsmāñ tirshūl aur ġhaurī se hai sahmā huā

fāḳhta kā zikr aise meñ kahāñ hone ko hai

ghar meñ hai āb-e-ravāñ to barf hai mañjdhār meñ

kuchh na pūchho dahr meñ ab kyā kahāñ hone ko hai

dard ki sakit nadi phir se rawan hone ko hai

mauj-e-hairat ka tamasha ab kahan hone ko hai

jo giran-bar-e-samaat tha kabhi sab ke liye

ab wahi kalima yahan husn-e-bayan hone ko hai

kyun karen wo apni qismat ke sitare ki talash

dastaras mein jin ke sara aasman hone ko hai

mujh ko us manzil se guzre kitni muddat ho gai

waqt meri justuju mein ab jahan hone ko hai

tajrabe ki aanch par har shai hai yun aatash-bajaan

chandni bhi surat-e-barq-e-tapan hone ko hai

aasman tirshul aur ghauri se hai sahma hua

faKHta ka zikr aise mein kahan hone ko hai

ghar mein hai aab-e-rawan to barf hai manjdhaar mein

kuchh na puchho dahr mein ab kya kahan hone ko hai