dard ki shaKH pe ek taza samar aa gaya hai

dard kī shāḳh pe ik taaza samar aa gayā hai

kis kī aamad hai 'ziyā' kaun nazar aa gayā hai

jaane kis jurm kī paa.ī hai sazā pairoñ ne

ik safar ḳhatm pe hai aglā safar aa gayā hai

lahr ḳhud par hai pashemān ki us kī zad meñ

nanhe hāthoñ se banā ret kā ghar aa gayā hai

dard bhī sahnā tabassum bhī laboñ par rakhnā

marhabā ishq hameñ bhī ye hunar aa gayā hai

aa gayā us kī buzurgī kā ḳhayāl āñdhī ko

ve jo ik raah meñ bosīda shajar aa gayā hai

us kī āñkhoñ meñ nahīñ pahlī sī chāhat lekin

ye bhī kyā kam hai ki ve lauT ke ghar aa gayā hai

apnī mahrūmī pe hone hī lagā thā māyūs

dekhtā kyā huuñ duāoñ meñ asar aa gayā hai

zindagī rok ke aksar yahī kahtī hai mujhe

tujh ko jaanā thā kidhar aur kidhar aa gayā hai

haq parastoñ ke liye sabr kā lamha hai 'ziyā'

jhuuT ke neze pe sachchā.ī kā sar aa gayā hai

dard ki shaKH pe ek taza samar aa gaya hai

kis ki aamad hai 'ziya' kaun nazar aa gaya hai

jaane kis jurm ki pai hai saza pairon ne

ek safar KHatm pe hai agla safar aa gaya hai

lahr KHud par hai pasheman ki us ki zad mein

nanhe hathon se bana ret ka ghar aa gaya hai

dard bhi sahna tabassum bhi labon par rakhna

marhaba ishq hamein bhi ye hunar aa gaya hai

aa gaya us ki buzurgi ka KHayal aandhi ko

we jo ek rah mein bosida shajar aa gaya hai

us ki aankhon mein nahin pahli si chahat lekin

ye bhi kya kam hai ki we lauT ke ghar aa gaya hai

apni mahrumi pe hone hi laga tha mayus

dekhta kya hun duaon mein asar aa gaya hai

zindagi rok ke aksar yahi kahti hai mujhe

tujh ko jaana tha kidhar aur kidhar aa gaya hai

haq paraston ke liye sabr ka lamha hai 'ziya'

jhuT ke neze pe sachchai ka sar aa gaya hai