dard shayan-e-shan-e-dil bhi nahin

dard shāyān-e-shān-e-dil bhī nahīñ

aur shab-e-hijr mustaqil bhī nahīñ

yuuñ gale mil ke fā.eda kyā hai

zaḳhm andar se mundamil bhī nahīñ

vasl bhī hai firāq bhī is meñ

mausam-e-ishq mo.atadil bhī nahīñ

har kisī se ye mel kyuuñ khaa.e

dil to phir dil hai āb-o-gil bhī nahīñ

soch hai kuchh haqīqateñ kuchh haiñ

ḳhvāb-e-ta.abīr muttasil bhī nahīñ

ab bhī jaarī hai raqs miTTī kā

saañs ke taar muzmahil bhī nahīñ

ham jo rūThe haiñ jaan se 'zākir'

rabt TuuTā hai munfasil bhī nahīñ

dard shayan-e-shan-e-dil bhi nahin

aur shab-e-hijr mustaqil bhi nahin

yun gale mil ke faeda kya hai

zaKHm andar se mundamil bhi nahin

wasl bhi hai firaq bhi is mein

mausam-e-ishq moatadil bhi nahin

har kisi se ye mel kyun khae

dil to phir dil hai aab-o-gil bhi nahin

soch hai kuchh haqiqaten kuchh hain

KHwab-e-tabir muttasil bhi nahin

ab bhi jari hai raqs miTTi ka

sans ke tar muzmahil bhi nahin

hum jo ruThe hain jaan se 'zakir'

rabt TuTa hai munfasil bhi nahin