دریا دلی کی سن کے میں آیا تھا آس میں

دریا دلی کی سن کے میں آیا تھا آس میں

دو گھونٹ بھی ملے نہ سمندر کے طاس میں

پیر مغاں کا نام نہ بدنام ہو کہیں

جتنی ہو آج ڈال دے ساقی گلاس میں

عزت سے ہے وقار زمانے میں دوستو

عزت نہیں تو کچھ نہیں بشری اساس میں

مشکل میں حوصلوں کا سہارا اگر نہ ہو

آتا نہیں شعور دل بد حواس میں

اپنائیت خلوص وفا ربط باہمی

سب کچھ ملے گا تم کو غریبوں کے پاس میں

فانیؔ دبا نہ سوزش قلب و جگر کو یوں

چنگاریاں چھپاتا ہے کوئی کپاس میں