dariya-e-ashk chashm se jis aan bah gaya

dariyā-e-ashk chashm se jis aan bah gayā

sun lījiyo ki arsh kā aivān bah gayā

bal-be-gudāz-e-ishq ki ḳhuuñ ho ke dil ke saath

siine se tere tiir kā paikān bah gayā

zāhid sharāb piine se kāfir huā maiñ kyuuñ

kyā DeḌh chullū paanī meñ īmān bah gayā

hai mauj-e-bahr-e-ishq vo tūfāñ ki al-hafīz

bechāra musht-e-ḳhāk thā insān bah gayā

dariyā-e-ashk se dam-e-tahrīr hāl-e-dil

kashtī kī tarah merā qalam-dān bah gayā

ye ro.e phuuT phuuT ke paanī ke aable

naala sā ek sū-e-bayābān bah gayā

thā tū bahā meñ besh par us lab ke sāmne

sab mol terā lāl-e-badaḳhshān bah gayā

kashtī savār-e-umr huuñ bahr-e-fanā meñ 'zauq'

jis dam bahā ke le gayā tūfān bah gayā

thā 'zauq' pahle dehlī meñ panjāb kā sā husn

par ab vo paanī kahte haiñ multān bah gayā

dariya-e-ashk chashm se jis aan bah gaya

sun lijiyo ki arsh ka aiwan bah gaya

bal-be-gudaz-e-ishq ki KHun ho ke dil ke sath

sine se tere tir ka paikan bah gaya

zahid sharab pine se kafir hua main kyun

kya DeDh chullu pani mein iman bah gaya

hai mauj-e-bahr-e-ishq wo tufan ki al-hafiz

bechaara musht-e-KHak tha insan bah gaya

dariya-e-ashk se dam-e-tahrir haal-e-dil

kashti ki tarah mera qalam-dan bah gaya

ye roe phuT phuT ke pani ke aable

nala sa ek su-e-bayaban bah gaya

tha tu baha mein besh par us lab ke samne

sab mol tera lal-e-badaKHshan bah gaya

kashti sawar-e-umr hun bahr-e-fana mein 'zauq'

jis dam baha ke le gaya tufan bah gaya

tha 'zauq' pahle dehli mein panjab ka sa husn

par ab wo pani kahte hain multan bah gaya