dariya ki taraf dekh lo ek bar mere yar

dariyā kī taraf dekh lo ik baar mire yaar

ik mauj ki kahtī hai mire yaar mire yaar

vīrānī-e-gulshan pe hī ma.amūr hai mausam

miTTī se nikalte nahīñ ashjār mire yaar

kyā ḳhaak kisī ġhair pe dil ko ho bharosā

apne bhī hue jaate haiñ aġhyār mire yaar

maqtal sī fazā rahtī hai is mulk meñ har-dam

dekhe haiñ manāzir ka.ī ḳhūñ-bār mire yaar

ham ḳhāk-nashīnoñ kī yahāñ kaun sunegā

ūñche haiñ bahut ḳhvāb ke darbār mire yaar

dekho ye chalan Thiik nahīñ ishq meñ hargiz

va.ade se mukar jaate ho har baar mire yaar

do chaar hī alfāz mohabbat se bhare hoñ

to dasht ko kar dete haiñ gulzār mire yaar

'hassān' javāñ ḳhuub tirī mashq-e-suḳhan hai

har roz kahe jaate ho ash.ār mire yaar

dariya ki taraf dekh lo ek bar mere yar

ek mauj ki kahti hai mere yar mere yar

virani-e-gulshan pe hi mamur hai mausam

miTTi se nikalte nahin ashjar mere yar

kya KHak kisi ghair pe dil ko ho bharosa

apne bhi hue jate hain aghyar mere yar

maqtal si faza rahti hai is mulk mein har-dam

dekhe hain manazir kai KHun-bar mere yar

hum KHak-nashinon ki yahan kaun sunega

unche hain bahut KHwab ke darbar mere yar

dekho ye chalan Thik nahin ishq mein hargiz

wade se mukar jate ho har bar mere yar

do chaar hi alfaz mohabbat se bhare hon

to dasht ko kar dete hain gulzar mere yar

'hassan' jawan KHub teri mashq-e-suKHan hai

har roz kahe jate ho ashaar mere yar