dariya se iKHtilat hai hum ro nahin rahe

dariyā se iḳhtilāt hai ham ro nahīñ rahe

ronā hamārī zaat hai ham ro nahīñ rahe

is bad-dimāġh dil ne kiyā zabt kā bhī ḳhuun

ye sirf vārdāt hai ham ro nahīñ rahe

kitne dinoñ ke ba.ad ḳhushī se mile haiñ ham

phir bhī ajiib baat hai ham ro nahīñ rahe

ye din bhī koī din thā ajab ḳhush-gavār din

ye raat koī raat hai ham ro nahīñ rahe

rone lage to kaun hameñ chup karā.egā

so is kā ehtiyāt hai ham ro nahīñ rahe

aañsū kamā.e haiñ so tire diin ke liye

maulā yahī zakāt hai ham ro nahīñ rahe

dariya se iKHtilat hai hum ro nahin rahe

rona hamari zat hai hum ro nahin rahe

is bad-dimagh dil ne kiya zabt ka bhi KHun

ye sirf wardat hai hum ro nahin rahe

kitne dinon ke baad KHushi se mile hain hum

phir bhi ajib baat hai hum ro nahin rahe

ye din bhi koi din tha ajab KHush-gawar din

ye raat koi raat hai hum ro nahin rahe

rone lage to kaun hamein chup karaega

so is ka ehtiyat hai hum ro nahin rahe

aansu kamae hain so tere din ke liye

maula yahi zakat hai hum ro nahin rahe