Daro na tum ki na sun le kahin KHuda meri

Daro na tum ki na sun le kahīñ ḳhudā merī

ki rū-shanās-e-ijābat nahīñ duā merī

vo tum ki tum ne jafā kī to kuchh burā na kiyā

vo maiñ ki zikr ke qābil nahīñ vafā merī

chale bhī aao ki duniyā se jā rahā hai koī

suno ki phir na sunoge tum iltijā merī

kuchh aisī yaas se hasrat se maiñ ne dam toḌā

jigar ko thaam ke rah rah ga.ī qazā merī

ḳhudā ne zahr kī tāsīr baḳhsh dī 'fānī'

taras ga.ī thī asar ko bahut duā merī

Daro na tum ki na sun le kahin KHuda meri

ki ru-shanas-e-ijabat nahin dua meri

wo tum ki tum ne jafa ki to kuchh bura na kiya

wo main ki zikr ke qabil nahin wafa meri

chale bhi aao ki duniya se ja raha hai koi

suno ki phir na sunoge tum iltija meri

kuchh aisi yas se hasrat se main ne dam toDa

jigar ko tham ke rah rah gai qaza meri

KHuda ne zahr ki tasir baKHsh di 'fani'

taras gai thi asar ko bahut dua meri