dars-e-adab-e-junun yaad dilane wale

dars-e-ādāb-e-junūñ yaad dilāne vaale

aa ga.e phir mirī zanjīr hilāne vaale

kis tarah kho.e ga.e aks-e-ravāñ kī sūrat

shahr-e-hairāñ meñ tirā khoj lagāne vaale

ġhaur se dekh koī hai pas-e-tasvīr-e-ḳhizāñ

varna kis samt ga.e rang jamāne vaale

ḳham-e-mehrāb pe sadiyoñ kī siyah gard bhī dekh

tāq-e-vīrāñ meñ lahū apnā jalāne vaale

zahr ab zahr hai kartā nahīñ kār-e-tiryāk

mar ga.e zahr ko tiryāk banāne vaale

fasl-e-be-barg kuchh aisī bhī to be-rang nahīñ

dāstāñ ahd-e-bahārāñ kī sunāne vaale

daf-e-gul TuuT ga.ī dast-e-sabā meñ lekin

raqs karte hī rahe vajd meñ aane vaale

bujh ga.e shoḳh darīchoñ meñ damakte mahtāb

so ga.e raat kī taqdīr jagāne vaale

sochtā huuñ ki ye māmūra-e-ġham ye duniyā

kis liye tū ne banā.ī hai banāne vaale

dars-e-adab-e-junun yaad dilane wale

aa gae phir meri zanjir hilane wale

kis tarah khoe gae aks-e-rawan ki surat

shahr-e-hairan mein tera khoj lagane wale

ghaur se dekh koi hai pas-e-taswir-e-KHizan

warna kis samt gae rang jamane wale

KHam-e-mehrab pe sadiyon ki siyah gard bhi dekh

taq-e-viran mein lahu apna jalane wale

zahr ab zahr hai karta nahin kar-e-tiryak

mar gae zahr ko tiryak banane wale

fasl-e-be-barg kuchh aisi bhi to be-rang nahin

dastan ahd-e-bahaaran ki sunane wale

daf-e-gul TuT gai dast-e-saba mein lekin

raqs karte hi rahe wajd mein aane wale

bujh gae shoKH darichon mein damakte mahtab

so gae raat ki taqdir jagane wale

sochta hun ki ye mamura-e-gham ye duniya

kis liye tu ne banai hai banane wale