Darte hain chashm o zulf o nigah o ada se hum

Darte haiñ chashm o zulf o nigāh o adā se ham

har dam panāh māñgte haiñ har balā se ham

ma.ashūq jā-e-hūr mile mai bajā.e aab

mahshar meñ do savāl kareñge ḳhudā se ham

gar tū kisī bahāne aa jaa.e vaqt-e-naz.a

zālim kareñ hazār bahāne qazā se ham

go hāl-e-dil chhupāte haiñ par is ko kyā kareñ

aate haiñ ḳhud-ba-ḳhud nazar ik mubtalā se ham

nā-chār iḳhtiyār kiyā sheva-e-raqīb

kuchh be-hayā.ī ḳhuub haiñ guzre hayā se ham

māñgī na hogī ḳhizr ne yuuñ umr-e-jāvedāñ

kyā apnī maut māñgte haiñ iltijā se ham

dekheñ to pahle kaun miTe us kī raah meñ

baiThe haiñ shart bāñdh ke har naqsh-e-pā se ham

majbūr apnī sheva-e-sharm-o-hayā se tum

nā-chār iztirāb-e-dil-e-mubtalā se ham

ye aarzū hai aañkh meñ surma lagā.eñge

ai 'dāġh' ḳhāk-e-pā-e-rasūl-e-ḳhudā se ham

Darte hain chashm o zulf o nigah o ada se hum

har dam panah mangte hain har bala se hum

mashuq ja-e-hur mile mai bajae aab

mahshar mein do sawal karenge KHuda se hum

gar tu kisi bahane aa jae waqt-e-naza

zalim karen hazar bahane qaza se hum

go haal-e-dil chhupate hain par is ko kya karen

aate hain KHud-ba-KHud nazar ek mubtala se hum

na-chaar iKHtiyar kiya shewa-e-raqib

kuchh be-hayai KHub hain guzre haya se hum

mangi na hogi KHizr ne yun umr-e-jawedan

kya apni maut mangte hain iltija se hum

dekhen to pahle kaun miTe us ki rah mein

baiThe hain shart bandh ke har naqsh-e-pa se hum

majbur apni shewa-e-sharm-o-haya se tum

na-chaar iztirab-e-dil-e-mubtala se hum

ye aarzu hai aankh mein surma lagaenge

ai 'dagh' KHak-e-pa-e-rasul-e-KHuda se hum