dasht aise gulshan mein gul pe gul khilane ki har ada mubarak ho

dasht aise gulshan meñ gul pe gul khilāne kī har adā mubārak ho

nannhe-munhe ġhunchoñ se ḳhud-kushī karāne kā mashġhala mubārak ho

par-burīda bulbul ne jis jagah bhī tinkoñ se ghoñsle banā.e the

vo chaman jalāne ko ab bhī tere hāthoñ meñ sā.iqa mubārak ho

tū ne jin bechāroñ ke kam-sinoñ kī lāshoñ par pā-e-taḳht rakkhe haiñ

un ke jism-e-uryāñ par tere jabr-e-be-jā kā dabdaba mubārak ho

ḳhuun bahā chukā ab tak to javāñ parindoñ kā chaaT lag chukī tujh ko

ab se shīr-ḳhvāroñ ke taaza ḳhūn-e-arzāñ kā zā.iqa mubārak ho

sūfiyoñ buzurgoñ ne naqsh-e-pā jo chhoḌe the sab miTā diye tū ne

vaqt ke darinde ab kusht-o-ḳhūn kā ik ik rāsta mubārak ho

jabr-e-mujrimāna se tū chaman pe qābiz hai ab bhī tasfiya kar le

varna gulsitāñ terā kal jahāñ ke naqshe par sar kaTā mubārak ho

dasht aise gulshan mein gul pe gul khilane ki har ada mubarak ho

nannhe-munhe ghunchon se KHud-kushi karane ka mashghala mubarak ho

par-burida bulbul ne jis jagah bhi tinkon se ghonsle banae the

wo chaman jalane ko ab bhi tere hathon mein saiqa mubarak ho

tu ne jin bechaaron ke kam-sinon ki lashon par pa-e-taKHt rakkhe hain

un ke jism-e-uryan par tere jabr-e-be-ja ka dabdaba mubarak ho

KHun baha chuka ab tak to jawan parindon ka chaT lag chuki tujh ko

ab se shir-KHwaron ke taza KHun-e-arzan ka zaiqa mubarak ho

sufiyon buzurgon ne naqsh-e-pa jo chhoDe the sab miTa diye tu ne

waqt ke darinde ab kusht-o-KHun ka ek ek rasta mubarak ho

jabr-e-mujrimana se tu chaman pe qabiz hai ab bhi tasfiya kar le

warna gulsitan tera kal jahan ke naqshe par sar kaTa mubarak ho