dasht-e-hairat mein sabil-e-tishnagi ban jaiye

dasht-e-hairat meñ sabīl-e-tishnagī ban jā.iye

jo kabhī puurī na ho aisī kamī ban jā.iye

rāt-bhar rahiye mire hamrāh nīñdoñ kī tarah

din chaḌhe to lazzat-e-āvārgī ban jā.iye

pahle to mujh ko atā kiije vahī chehra mirā

vo nahīñ to phir mirī pahchān hī ban jā.iye

tā.ir-e-ḳhasta kī sūrat aap ko dekhā karūñ

shāḳh-e-sidra se utartī raushnī ban jā.iye

baiThe rahne se to lau dete nahīñ ye jism-o-jāñ

jugnuoñ kī chaal chaliye raushnī ban jā.iye

dasht-e-hairat mein sabil-e-tishnagi ban jaiye

jo kabhi puri na ho aisi kami ban jaiye

raat-bhar rahiye mere hamrah nindon ki tarah

din chaDhe to lazzat-e-awargi ban jaiye

pahle to mujh ko ata kije wahi chehra mera

wo nahin to phir meri pahchan hi ban jaiye

tair-e-KHasta ki surat aap ko dekha karun

shaKH-e-sidra se utarti raushni ban jaiye

baiThe rahne se to lau dete nahin ye jism-o-jaan

jugnuon ki chaal chaliye raushni ban jaiye