dasht ko DhunDne niklun to jazira nikle

dasht ko DhūñDne niklūñ to jazīra nikle

paañv rakhkhūñ jo maiñ vīrāne meñ duniyā nikle

ek biphrā huā dariyā hai mire chaar taraf

tū jo chāhe isī tūfāñ se kināra nikle

ek mausam hai dil o jaañ pe faqat din ho ki raat

āsmāñ koī ho dil par vahī taarā nikle

dekhtā huuñ maiñ tirī raah meñ dām-e-hairat

raushnī raat se aur dhuup se saaya nikle

is se pahle ye kabhī dil ne kahā hī kab thā

raat kuchh aur baḌhe chāñd dobāra nikle

aañkh jhuktī hai to miltī hai ḳhamoshī ko zabāñ

band hoñToñ se koī boltā dariyā nikle

ishq ik aisī havelī hai ki jis se bāhar

koī darvāza khule aur na darīcha nikle

sehr ne tere ajab raah sujhā.ī hamdam

ham kahāñ jaane ko nikle the kahāñ aa nikle

dasht ko DhunDne niklun to jazira nikle

panw rakhkhun jo main virane mein duniya nikle

ek biphra hua dariya hai mere chaar taraf

tu jo chahe isi tufan se kinara nikle

ek mausam hai dil o jaan pe faqat din ho ki raat

aasman koi ho dil par wahi tara nikle

dekhta hun main teri rah mein dam-e-hairat

raushni raat se aur dhup se saya nikle

is se pahle ye kabhi dil ne kaha hi kab tha

raat kuchh aur baDhe chand dobara nikle

aankh jhukti hai to milti hai KHamoshi ko zaban

band honTon se koi bolta dariya nikle

ishq ek aisi haweli hai ki jis se bahar

koi darwaza khule aur na daricha nikle

sehr ne tere ajab rah sujhai hamdam

hum kahan jaane ko nikle the kahan aa nikle