dasht kya shai hai junun kya hai diwane ke liye

dasht kyā shai hai junūñ kyā hai divāne ke liye

shahr kyā kam hai mujhe ḳhaak uḌāne ke liye

ham ne kyā jāniye kyā soch ke gulshan chhoḌā

fasl-e-gul der hī kyā thī tire aane ke liye

maiñ sarā.e ke nigahbāñ kī tarah tanhā huuñ

haa.e vo log ki jo aa.e the jaane ke liye

ham vahī soḳhta-sāmān-e-azal haiñ ki jinheñ

zindagī duur tak aa.ī thī manāne ke liye

dil kī mehrāb ko darkār hai ik sham.a faqat

vo jalāne ke liye ho ki bujhāne ke liye

tū mirī yaad se ġhāfil na tirī yaad se maiñ

ek dar-parda kashākash hai bhulāne ke liye

zabt-e-paiham ke nisār ai dil-e-āzār-talab

shart-e-dāman bhī uThā ashk bahāne ke liye

sun mujhe ġhaur se sun naġhma-e-nā-paidā huuñ

koī āmāda nahīñ saaz uThāne ke liye

harf-e-nā-gufta kī rūdād liye phirte haiñ

pahle kahte the ġhazal un ko sunāne ke liye

dil kī daryūza-gar-e-harf-e-tasallī na rahā

ham ne ye rasm uThā dī hai zamāne ke liye

saañs roke hue phirtā huuñ bhare shahr meñ 'shāz'

us ne kyā raaz diyā mujh ko chhupāne ke liye

dasht kya shai hai junun kya hai diwane ke liye

shahr kya kam hai mujhe KHak uDane ke liye

hum ne kya jaaniye kya soch ke gulshan chhoDa

fasl-e-gul der hi kya thi tere aane ke liye

main sarae ke nigahban ki tarah tanha hun

hae wo log ki jo aae the jaane ke liye

hum wahi soKHta-saman-e-azal hain ki jinhen

zindagi dur tak aai thi manane ke liye

dil ki mehrab ko darkar hai ek shama faqat

wo jalane ke liye ho ki bujhane ke liye

tu meri yaad se ghafil na teri yaad se main

ek dar-parda kashakash hai bhulane ke liye

zabt-e-paiham ke nisar ai dil-e-azar-talab

shart-e-daman bhi uTha ashk bahane ke liye

sun mujhe ghaur se sun naghma-e-na-paida hun

koi aamada nahin saz uThane ke liye

harf-e-na-gufta ki rudad liye phirte hain

pahle kahte the ghazal un ko sunane ke liye

dil ki daryuza-gar-e-harf-e-tasalli na raha

hum ne ye rasm uTha di hai zamane ke liye

sans roke hue phirta hun bhare shahr mein 'shaz'

us ne kya raaz diya mujh ko chhupane ke liye