dasht le jae ki ghar le jae

dasht le jaa.e ki ghar le jaa.e

terī āvāz jidhar le jaa.e

ab yahī soch rahī haiñ āñkheñ

koī tā-hadd-e-nazar le jaa.e

manzileñ bujh ga.iiñ chehroñ kī tarah

ab jidhar rāhguzar le jaa.e

terī āshufta-mizājī ai dil

kyā ḳhabar kaun nagar le jaa.e

saya-e-abr se pūchho 'sarvat'

apne hamrāh agar le jaa.e

dasht le jae ki ghar le jae

teri aawaz jidhar le jae

ab yahi soch rahi hain aankhen

koi ta-hadd-e-nazar le jae

manzilen bujh gain chehron ki tarah

ab jidhar rahguzar le jae

teri aashufta-mizaji ai dil

kya KHabar kaun nagar le jae

saya-e-abr se puchho 'sarwat'

apne hamrah agar le jae