dasht mein qais nahin koh pe farhad nahin

dasht meñ qais nahīñ koh pe farhād nahīñ

hai vahī ishq kī duniyā magar ābād nahīñ

DhūñDhne ko tujhe o mere na milne vaale

vo chalā hai jise apnā bhī pata yaad nahīñ

rūh-e-bulbul ne ḳhizāñ ban ke ujāḌā gulshan

phuul kahte rahe ham phuul haiñ sayyād nahīñ

husn se chuuk huī is kī hai tārīḳh gavāh

ishq se bhuul huī hai ye mujhe yaad nahīñ

barbat-e-māh pe mizrāb-e-fuġhāñ rakh dī thī

maiñ ne ik naġhma sunāyā thā tumheñ yaad nahīñ

laao ik sajda karūñ ālam-e-mastī meñ

log kahte haiñ ki 'sāġhar' ko ḳhudā yaad nahīñ

dasht mein qais nahin koh pe farhad nahin

hai wahi ishq ki duniya magar aabaad nahin

DhunDhne ko tujhe o mere na milne wale

wo chala hai jise apna bhi pata yaad nahin

ruh-e-bulbul ne KHizan ban ke ujaDa gulshan

phul kahte rahe hum phul hain sayyaad nahin

husn se chuk hui is ki hai tariKH gawah

ishq se bhul hui hai ye mujhe yaad nahin

barbat-e-mah pe mizrab-e-fughan rakh di thi

main ne ek naghma sunaya tha tumhein yaad nahin

lao ek sajda karun aalam-e-masti mein

log kahte hain ki 'saghar' ko KHuda yaad nahin