dasht-o-sahra mein kabhi KHak uDa bhi na sakun

dasht-o-sahrā meñ kabhī ḳhaak uḌā bhī na sakūñ

itnā gumrāh na kariyo tujhe pā bhī na sakūñ

mashrab-e-mūsā pe hasrat kā asā thāme hue

ḳhizr ko DhūñDh rahā huuñ kahīñ jā bhī na sakūñ

ab tū mujh se na judā hone kī qasmeñ khā le

maiñ to yāqūb nahīñ ashk bahā bhī na sakūñ

kyā sitam hai mirī tasvīr banāne vaale

maiñ tujhe apne tasavvur meñ basā bhī na sakūñ

yuuñ jalā koī sharar tak na rahe mujh meñ vuqūa

tūr-e-ummīd kā ik tinkā jalā bhī na sakūñ

hosh uḌā jā ki sivā tere na sochūñ kuchh bhī

niiñd uḌā jā ki koī ḳhvāb sajā bhī na sakūñ

aql meñ bhī to samā dil meñ samāne vaale

yaad kuchh rakh na sakūñ aur bhulā bhī na sakūñ

apne dāman kā har ik taar udheḌe hue maiñ

apnī 'shādāb' tabī.at ko chhupā bhī na sakūñ

dasht-o-sahra mein kabhi KHak uDa bhi na sakun

itna gumrah na kariyo tujhe pa bhi na sakun

mashrab-e-musa pe hasrat ka asa thame hue

KHizr ko DhunDh raha hun kahin ja bhi na sakun

ab tu mujh se na juda hone ki qasmen kha le

main to yaqub nahin ashk baha bhi na sakun

kya sitam hai meri taswir banane wale

main tujhe apne tasawwur mein basa bhi na sakun

yun jala koi sharar tak na rahe mujh mein wuqua

tur-e-ummid ka ek tinka jala bhi na sakun

hosh uDa ja ki siwa tere na sochun kuchh bhi

nind uDa ja ki koi KHwab saja bhi na sakun

aql mein bhi to sama dil mein samane wale

yaad kuchh rakh na sakun aur bhula bhi na sakun

apne daman ka har ek tar udheDe hue main

apni 'shadab' tabiat ko chhupa bhi na sakun