dast-e-asa-e-moajiza-gar bhi usi ka hai

dast-e-asā-e-mo.ajiza-gar bhī usī kā hai

gahre samundaroñ meñ safar bhī usī kā hai

terā yaqīn sach hai mirī chashm-e-etibār

sab kuchh fasīl-e-shab ke udhar bhī usī kā hai

bas apnā apnā farz adā kar rahe haiñ log

varna sināñ bhī us kī hai sar bhī usī kā hai

teġh-e-sitam ko jis ne atā kī haiñ mohlateñ

fariyād-e-kushtagāñ meñ asar bhī usī kā hai

manzar meñ jitne rang haiñ nairang usī ke haiñ

hairāniyoñ meñ zauq-e-nazar bhī usī kā hai

mujrim huuñ aur ḳharāba-e-jāñ meñ amaañ nahīñ

ab maiñ kahāñ chhupūñ ki ye ghar bhī usī kā hai

ḳhud ko charāġh-e-rāhguzar jāntā huuñ maiñ

lekin charāġh-e-rāhguzar bhī usī kā hai

dast-e-asa-e-moajiza-gar bhi usi ka hai

gahre samundaron mein safar bhi usi ka hai

tera yaqin sach hai meri chashm-e-etibar

sab kuchh fasil-e-shab ke udhar bhi usi ka hai

bas apna apna farz ada kar rahe hain log

warna sinan bhi us ki hai sar bhi usi ka hai

tegh-e-sitam ko jis ne ata ki hain mohlaten

fariyaad-e-kushtagan mein asar bhi usi ka hai

manzar mein jitne rang hain nairang usi ke hain

hairaniyon mein zauq-e-nazar bhi usi ka hai

mujrim hun aur KHaraba-e-jaan mein aman nahin

ab main kahan chhupun ki ye ghar bhi usi ka hai

KHud ko charagh-e-rahguzar jaanta hun main

lekin charagh-e-rahguzar bhi usi ka hai