dast-e-kohsar se phisla hua patthar hun main

dast-e-kohsār se phislā huā patthar huuñ maiñ

sar-ba-sar sañg-tarāshoñ kā muqaddar huuñ maiñ

ghūñT lamhāt kī pī pī ke dhulā jaatā huuñ

an-ginat vaqt ke dhāroñ kā shanāvar huuñ maiñ

kyā Dubo detā huuñ maiñ dil ke kueñ meñ ḳhud ko

chashm-e-be-nūr meñ yūsuf kā barādar huuñ maiñ

kirchiyāñ zehn meñ paivast haiñ palkoñ kī tarah

chashm-e-ayyām se chhūTā huā sāġhar huuñ maiñ

oḌh letī hai mujhe sard fazā kī devī

karb kī dhuup meñ taptī huī chādar huuñ maiñ

merī āvāz ko āvāz ne taqsīm kiyā

radio meñ huuñ telephone ke andar huuñ maiñ

na.e māhaul se mānūs nahīñ huuñ ab tak

nanhe bachche kī tarah ḳhol ke andar huuñ maiñ

chand ash.ār mile type-shuda daftar meñ

type-writer pe biThāyā huā bandar huuñ maiñ

dast-e-kohsar se phisla hua patthar hun main

sar-ba-sar sang-tarashon ka muqaddar hun main

ghunT lamhat ki pi pi ke dhula jata hun

an-ginat waqt ke dhaaron ka shanawar hun main

kya Dubo deta hun main dil ke kuen mein KHud ko

chashm-e-be-nur mein yusuf ka baradar hun main

kirchiyan zehn mein paiwast hain palkon ki tarah

chashm-e-ayyam se chhuTa hua saghar hun main

oDh leti hai mujhe sard faza ki dewi

karb ki dhup mein tapti hui chadar hun main

meri aawaz ko aawaz ne taqsim kiya

radio mein hun telephone ke andar hun main

nae mahaul se manus nahin hun ab tak

nanhe bachche ki tarah KHol ke andar hun main

chand ashaar mile type-shuda daftar mein

type-writer pe biThaya hua bandar hun main