dast-e-munim meri mehnat ka KHaridar sahi

dast-e-mun.im mirī mehnat kā ḳharīdār sahī

koī din aur maiñ rusvā sar-e-bāzār sahī

phir bhī kahlā.ūñgā āvāra-e-gesū-e-bahār

maiñ tirā dām-e-ḳhizāñ laakh giraftār sahī

jast kartā huuñ to laḌ jaatī hai manzil se nazar

hā.il-e-rāh koī aur bhī dīvār sahī

ġhairat-e-sañg hai saaqī ye gulū-e-tishna

tere paimāne meñ jo mauj hai talvār sahī

maiñ ne dekhī dekhī usī meñ ġham-e-daurāñ kī jhalak

be-ḳhabar rañg-e-jahāñ se nigah-e-yār sahī

un se bichhḌe hue 'majrūh' zamāna guzrā

ab bhī hoñToñ meñ vahī garmi-e-ruḳhsār sahī

dast-e-munim meri mehnat ka KHaridar sahi

koi din aur main ruswa sar-e-bazar sahi

phir bhi kahlaunga aawara-e-gesu-e-bahaar

main tera dam-e-KHizan lakh giraftar sahi

jast karta hun to laD jati hai manzil se nazar

hail-e-rah koi aur bhi diwar sahi

ghairat-e-sang hai saqi ye gulu-e-tishna

tere paimane mein jo mauj hai talwar sahi

main ne dekhi dekhi usi mein gham-e-dauran ki jhalak

be-KHabar rang-e-jahan se nigah-e-yar sahi

un se bichhDe hue 'majruh' zamana guzra

ab bhi honTon mein wahi garmi-e-ruKHsar sahi