dast-e-shabnam pe dam-e-shoala-nawai na rakho

dast-e-shabnam pe dam-e-sho.ala-navā.ī na rakho

sub.h kī god meñ shab bhar kī kamā.ī na rakho

merī yādoñ ke sanam ḳhānoñ se uThne do dhuāñ

mere siine pe abhī dast-e-hinā.ī na rakho

jaag jaa.e na kahīñ husn kā sotā pindār

dīda-e-shauq meñ andāz-e-gadā.ī na rakho

shab ko rahne do yuuñ hī shām-o-sahar kā paivand

Dar ke zulmāt se buniyād-e-judā.ī na rakho

husn bhī apne taqāzoñ se hai āḳhir majbūr

husn ke dosh pe ilzām-e-ḳhudā.ī na rakho

phir kisī taur sameTo ye bikharte hue rañg

yuuñ pareshān tasavvur kī ikaa.ī na rakho

apne vijdān se bhī kaam nikālo koī

rāhbar hī ke liye rāh-numā.ī na rakho

apne zaḳhmoñ ko chhupāo kisī unvān 'samad'

rahguzāroñ meñ ġham-e-ābla paa.ī na rakho

dast-e-shabnam pe dam-e-shoala-nawai na rakho

subh ki god mein shab bhar ki kamai na rakho

meri yaadon ke sanam KHanon se uThne do dhuan

mere sine pe abhi dast-e-hinai na rakho

jag jae na kahin husn ka sota pindar

dida-e-shauq mein andaz-e-gadai na rakho

shab ko rahne do yun hi sham-o-sahar ka paiwand

Dar ke zulmat se buniyaad-e-judai na rakho

husn bhi apne taqazon se hai aaKHir majbur

husn ke dosh pe ilzam-e-KHudai na rakho

phir kisi taur sameTo ye bikharte hue rang

yun pareshan tasawwur ki ikai na rakho

apne wijdan se bhi kaam nikalo koi

rahbar hi ke liye rah-numai na rakho

apne zaKHmon ko chhupao kisi unwan 'samad'

rahguzaron mein gham-e-abla pai na rakho