dast-o-pa mein mere halqe jo ye zanjir ke hain

dast-o-pā meñ mire halqe jo ye zanjīr ke haiñ

dar-haqīqat ye karishme mirī taqdīr ke haiñ

qābil-e-dād nahīñ kyā vo musavvir logo

shahr-dar-shahr jo charche kisī tasvīr ke haiñ

tishna-lab jo lab-e-dariyā pe bhī haiñ rahte hue

vo satā.e hue bigḌī huī taqdīr ke haiñ

hausla fat.h kā zāmin huā kartā hai magar

mere dushman haiñ ki qaa.il mirī shamshīr ke haiñ

ġhair dānista nahīñ haiñ mire afsāne meñ

vo ka.ī lafz jo tishna mirī tafsīr ke haiñ

ḳhush agar apnī ḳhatāoñ pe ho tum to ham bhī

mānñe vaale abhī ishq kī tāsīr ke haiñ

us ne sauñpī thī jo beToñ ko virāsat meñ kabhī

aaj afsūñ ki TukḌe usī jāgīr ke hai

ye sitāre nahīñ 'tālib' ki ye TuuTe hue ḳhvāb

kisī lailā kisī shīrīñ ke kisī hiir ke haiñ

dast-o-pa mein mere halqe jo ye zanjir ke hain

dar-haqiqat ye karishme meri taqdir ke hain

qabil-e-dad nahin kya wo musawwir logo

shahr-dar-shahr jo charche kisi taswir ke hain

tishna-lab jo lab-e-dariya pe bhi hain rahte hue

wo satae hue bigDi hui taqdir ke hain

hausla fath ka zamin hua karta hai magar

mere dushman hain ki qail meri shamshir ke hain

ghair danista nahin hain mere afsane mein

wo kai lafz jo tishna meri tafsir ke hain

KHush agar apni KHataon pe ho tum to hum bhi

manne wale abhi ishq ki tasir ke hain

us ne saunpi thi jo beTon ko wirasat mein kabhi

aaj afsun ki TukDe usi jagir ke hai

ye sitare nahin 'talib' ki ye TuTe hue KHwab

kisi laila kisi shirin ke kisi hir ke hain