dastak hui to sar pe dupaTTa sambhal gaya

dastak huī to sar pe dupaTTā sambhal gayā

chhoTā sā ik charāġh mire dil meñ jal gayā

jaate hue rukā hī nahīñ ek pal bhī vo

saare sitāre paañv ke nīche kuchal gayā

tāñbe kī TukḌiyāñ sī bikhartī chalī ga.iiñ

phir dekhte hī dekhte sūraj pighal gayā

bārish kī buuñd buuñd ko tarsā huā thā shahr

āñchal havā kā thaam ke bādal nikal gayā

roTī tave pe sahmī huī dekhtī rahī

chūlhā bhaḌak uThā thā mirā haath jal gayā

hairat hanūz TuuTe hue aa.ine meñ thī

mujh par tirī kamān se kyoñ tiir chal gayā

biite hue dinoñ kā dhuāñ phailtā rahā

yuuñ hī kanār-e-chashm jo aañsū phisal gayā

dastak hui to sar pe dupaTTa sambhal gaya

chhoTa sa ek charagh mere dil mein jal gaya

jate hue ruka hi nahin ek pal bhi wo

sare sitare panw ke niche kuchal gaya

tanbe ki TukDiyan si bikharti chali gain

phir dekhte hi dekhte suraj pighal gaya

barish ki bund bund ko tarsa hua tha shahr

aanchal hawa ka tham ke baadal nikal gaya

roTi tawe pe sahmi hui dekhti rahi

chulha bhaDak uTha tha mera hath jal gaya

hairat hanuz TuTe hue aaine mein thi

mujh par teri kaman se kyon tir chal gaya

bite hue dinon ka dhuan phailta raha

yun hi kanar-e-chashm jo aansu phisal gaya