parda-dar hasti thi zat ke samundar mein

parda-dār hastī thī zaat ke samundar meñ

husn ḳhuub khul khelā is sifat ke manzar meñ

husn ishq meñ hai yā ishq husn meñ muzmar

jauhar aa.ine meñ yā ā.īna hai jauhar meñ

ishq-e-mahshar-ārā kī tuur par girī bijlī

husn-e-lan-tarānī ki rah sakā na chādar meñ

dekh ai tamāshā.ī gul hai rañg-o-bū bilkul

imtiyāz nā-mumkin hai arz se jauhar meñ

gul meñ aur bulbul meñ kaun jaane kyā guzrī

chashm-posh mastī thī is barahna manzar meñ

upchī banāte haiñ husn ko suḳhan go kyuuñ

kaaT in adāoñ kā kab hai teġh-o-ḳhanjar meñ

fart-e-soz-e-ulfat meñ dekh kar sakūñ dil kā

bijliyāñ machaltī haiñ bādaloñ ke mahshar meñ

chāragar ko hairat hai irtiqa-e-vahsaht se

paañv meñ jo chakkar thā aa rahā hai vo sar meñ

hasrat ārmān kī ho kahnā se gunjā.ish

hai vahī mire dil meñ hai vahī mire sar meñ

hoñ vo riñd yā suufī mast us kī dhun meñ haiñ

jaane kitne mai-ḳhāne bhar diye haiñ kausar meñ

charḳh kyā utar aayā aaj farsh-e-gītī par

riñd bhī haiñ chakkar meñ mai-kada bhī chakkar meñ

mai vo hosh par afgan aur nazar vo sahbā-pāsh

mast kyuuñ na ho 'kaifī' ek do hī sāġhar meñ

parda-dar hasti thi zat ke samundar mein

husn KHub khul khela is sifat ke manzar mein

husn ishq mein hai ya ishq husn mein muzmar

jauhar aaine mein ya aaina hai jauhar mein

ishq-e-mahshar-ara ki tur par giri bijli

husn-e-lan-tarani ki rah saka na chadar mein

dekh ai tamashai gul hai rang-o-bu bilkul

imtiyaz na-mumkin hai arz se jauhar mein

gul mein aur bulbul mein kaun jaane kya guzri

chashm-posh masti thi is barahna manzar mein

upchi banate hain husn ko suKHan go kyun

kaT in adaon ka kab hai tegh-o-KHanjar mein

fart-e-soz-e-ulfat mein dekh kar sakun dil ka

bijliyan machalti hain baadalon ke mahshar mein

chaaragar ko hairat hai irtiqa-e-wahsaht se

panw mein jo chakkar tha aa raha hai wo sar mein

hasrat aarman ki ho kahna se gunjaish

hai wahi mere dil mein hai wahi mere sar mein

hon wo rind ya sufi mast us ki dhun mein hain

jaane kitne mai-KHane bhar diye hain kausar mein

charKH kya utar aaya aaj farsh-e-giti par

rind bhi hain chakkar mein mai-kada bhi chakkar mein

mai wo hosh par afgan aur nazar wo sahba-pash

mast kyun na ho 'kaifi' ek do hi saghar mein