daulat-e-duniya kahan darkar hai

daulat-e-duniyā kahāñ darkār hai

mujh ko terā āstāñ darkār hai

aap ko bhī ik sahārā chāhiye

mujh ko bhī ik ham-zabāñ darkār hai

zindagī kī is kaḌaktī dhuup meñ

sāya-e-sard-e-ravāñ darkār hai

barq-o-bārāñ kā uḌaa.e jo mazāq

aaj vo azm-e-javāñ darkār hai

zindagī se hai ibārat ik jihād

sher kī tāb-o-tavāñ darkār hai

tīr-o-nashtar sher yuuñ bantā nahīñ

ik dil-e-ātishīñ-fashāñ darkār hai

chāhiye iqbāl kī fikr-e-rasā

daaġh kī tab-e-ravāñ darkār hai

ho tahārat 'hālī'-o-'mahrūm' kī

'mīr'-o-'momin' kī zabāñ darkār hai

sher se mahzūz hone ke liye

lazzat-e-dard-e-nihāñ darkār hai

ahl-e-mahfil ko tarannum chāhiye

shā.irī un ko kahāñ darkār hai

murshid-e-kāmil kī mujh ko hai talāsh

majlis-e-rūhāniyāñ darkār hai

ruuh ko jis se mile bālīdgī

mujh ko vo pīr-e-muġhāñ darkār hai

man kā saarā mail jis se duur ho

vo sharāb-e-arġhavāñ darkār hai

ham pe jo guzrī vo kahne ke liye

husn-o-uslūb-e-bayāñ darkār hai

zindagī kā raaz paane ke liye

ham ko umr-e-jāvedāñ darkār hai

mujh ko apne dostoñ se ai 'bahār'

ik ḳhulūs-e-be-karāñ darkār hai

daulat-e-duniya kahan darkar hai

mujh ko tera aastan darkar hai

aap ko bhi ek sahaara chahiye

mujh ko bhi ek ham-zaban darkar hai

zindagi ki is kaDakti dhup mein

saya-e-sard-e-rawan darkar hai

barq-o-baran ka uDae jo mazaq

aaj wo azm-e-jawan darkar hai

zindagi se hai ibarat ek jihad

sher ki tab-o-tawan darkar hai

tir-o-nashtar sher yun banta nahin

ek dil-e-atishin-fashan darkar hai

chahiye iqbaal ki fikr-e-rasa

dagh ki tab-e-rawan darkar hai

ho tahaarat 'haali'-o-'mahrum' ki

'mir'-o-'momin' ki zaban darkar hai

sher se mahzuz hone ke liye

lazzat-e-dard-e-nihan darkar hai

ahl-e-mahfil ko tarannum chahiye

shairi un ko kahan darkar hai

murshid-e-kaamil ki mujh ko hai talash

majlis-e-ruhaniyan darkar hai

ruh ko jis se mile baalidgi

mujh ko wo pir-e-mughan darkar hai

man ka sara mail jis se dur ho

wo sharab-e-arghawan darkar hai

hum pe jo guzri wo kahne ke liye

husn-o-uslub-e-bayan darkar hai

zindagi ka raaz pane ke liye

hum ko umr-e-jawedan darkar hai

mujh ko apne doston se ai 'bahaar'

ek KHulus-e-be-karan darkar hai