daulat-e-harf-o-bayan sath liye phirte hain

daulat-e-harf-o-bayāñ saath liye phirte haiñ

ham mohabbat kā jahāñ saath liye phirte haiñ

ik tabassum pe na jaanā ki tire dīvāne

ġham kā ik koh-e-girāñ saath liye phirte haiñ

jis pe ik saañs kī takrār se baal aa jaa.e

ham vo shīshe kā makāñ saath liye phirte haiñ

āñdhiyāñ us ko bujhāne ke liye haiñ betāb

ham jo ye mish.al-e-jāñ saath liye phirte haiñ

dasht-e-ġhurbat meñ buzurgoñ kī duā hai hamrāh

sāya-e-abr-e-ravāñ saath liye phirte haiñ

sañg-e-dar se jo tire sūrat-e-sauġhāt milā

raushnī kā vo nishāñ saath liye phirte haiñ

ham ne dekhā to nahīñ sirf sunā hai ki 'sarosh'

āj-kal sarv-e-ravāñ saath liye phirte haiñ

daulat-e-harf-o-bayan sath liye phirte hain

hum mohabbat ka jahan sath liye phirte hain

ek tabassum pe na jaana ki tere diwane

gham ka ek koh-e-giran sath liye phirte hain

jis pe ek sans ki takrar se baal aa jae

hum wo shishe ka makan sath liye phirte hain

aandhiyan us ko bujhane ke liye hain betab

hum jo ye mishal-e-jaan sath liye phirte hain

dasht-e-ghurbat mein buzurgon ki dua hai hamrah

saya-e-abr-e-rawan sath liye phirte hain

sang-e-dar se jo tere surat-e-saughat mila

raushni ka wo nishan sath liye phirte hain

hum ne dekha to nahin sirf suna hai ki 'sarosh'

aaj-kal sarw-e-rawan sath liye phirte hain