daur-e-aghaz-e-jafa dil ka sahaara nikla

daur-e-āġhāz-e-jafā dil kā sahārā niklā

hausla kuchh na hamārā na tumhārā niklā

terā naam aate hī sakte kā thā 'ālam mujh par

jaane kis tarah ye mazkūr dobārā niklā

hosh jaatā hai jigar jaatā hai dil jaatā hai

parde hī parde meñ kyā terā ishārā niklā

hai tire kashf-o-karāmāt kī duniyā qaa.il

tujh se ai dil na magar kaam hamārā niklā

kitne saffāk sar-e-qatl-gah-e-ālam the

lākhoñ meñ bas vahī allāh kā pyārā niklā

ibrat-añgez hai kyā us kī javāñ-margī bhī

haa.e vo dil jo hamārā na tumhārā niklā

'ishq kī lau se farishtoñ ke bhī par jalte haiñ

rashk-e-ḳhurshīd-e-qayāmat ye sharārā niklā

sar-ba-sar be-sar-o-sāmāñ jise samjhe the vo dil

rashk-e-jamshed-o-kai-o-ḳhusrau-o-dārā niklā

rone vaale hue chup hijr kī duniyā badlī

sham' be-nūr huī sub.h kā taarā niklā

uñgliyāñ uTThīñ 'firāq'-e-vatan-āvāra par

aaj jis samt se vo dard kā maarā niklā

daur-e-aghaz-e-jafa dil ka sahaara nikla

hausla kuchh na hamara na tumhaara nikla

tera nam aate hi sakte ka tha 'alam mujh par

jaane kis tarah ye mazkur dobara nikla

hosh jata hai jigar jata hai dil jata hai

parde hi parde mein kya tera ishaara nikla

hai tere kashf-o-karamat ki duniya qail

tujh se ai dil na magar kaam hamara nikla

kitne saffak sar-e-qatl-gah-e-alam the

lakhon mein bas wahi allah ka pyara nikla

ibrat-angez hai kya us ki jawan-margi bhi

hae wo dil jo hamara na tumhaara nikla

'ishq ki lau se farishton ke bhi par jalte hain

rashk-e-KHurshid-e-qayamat ye sharara nikla

sar-ba-sar be-sar-o-saman jise samjhe the wo dil

rashk-e-jamshed-o-kai-o-KHusrau-o-dara nikla

rone wale hue chup hijr ki duniya badli

sham' be-nur hui subh ka tara nikla

ungliyan uTThin 'firaq'-e-watan-awara par

aaj jis samt se wo dard ka mara nikla