daur-e-hazir ka ye kirdar KHuda KHair kare

daur-e-hāzir kā ye kirdār ḳhudā ḳhair kare

maañ se beTe ko nahīñ pyaar ḳhudā ḳhair kare

pyaar auroñ meñ to ham baañT rahe the kal tak

aaj aapas meñ hai takrār ḳhudā ḳhair kare

bas-ki ābād hamāre hī lahū se hai chaman

ham chaman ke nahīñ haqdār ḳhudā ḳhair kare

ek nā-ahl hai is vaqt chaman kā maalī

phuul bhī to nahīñ bedār ḳhudā ḳhair kare

chhūT kar haath se do-chār gireñ to kyā ho

ek thālī kī ye jhankār ḳhudā ḳhair kare

nā-mukammal hai nasheman mirā lekin bijlī

ban ga.ī tālib-e-dīdār ḳhudā ḳhair kare

jaane kab kaise 'qamar' pyaas bujhegī is kī

pī rahī hai lahū talvār ḳhudā ḳhair kare

daur-e-hazir ka ye kirdar KHuda KHair kare

man se beTe ko nahin pyar KHuda KHair kare

pyar auron mein to hum banT rahe the kal tak

aaj aapas mein hai takrar KHuda KHair kare

bas-ki aabaad hamare hi lahu se hai chaman

hum chaman ke nahin haqdar KHuda KHair kare

ek na-ahl hai is waqt chaman ka mali

phul bhi to nahin bedar KHuda KHair kare

chhuT kar hath se do-chaar giren to kya ho

ek thaali ki ye jhankar KHuda KHair kare

na-mukammal hai nasheman mera lekin bijli

ban gai talib-e-didar KHuda KHair kare

jaane kab kaise 'qamar' pyas bujhegi is ki

pi rahi hai lahu talwar KHuda KHair kare